Didedikasikan untuk peringatan 70 tahun orang Maluku di Belanda (Foto : Sondorsonoo)

Ale inga katong ini sapa

Ale lia katong ini sapa

Ana-ana Nunusaku

Langit tanah jadi satu, alifuru

Jadi nunu wae sane

bukang teru tapi sane

yang mangalir dalam darah

mandidih panas macam tala

mangalir nyali dalam eti sapalewa

dapa jaga dari upu tahola

satu nyawa, satu jiwa, Ina Ama!

Ale inga katong ini sapa

Ale inga ulu sejarah di parang pattimura

Ale inga mata ombak di tombak Martha Christina

Ana-ana kabaresi

dari rahim kapua upu ila kahuresi

inga darah-darah yang su jadi lautang

yang manetes dari cinta-cinta kapitang

inga Jan Pieterszoon, inga Banda, inga balanda

inga barapa ribu nyawa jadi tanda

inga, inga, kasi tanda di dada

gunung kaskaluar api

katong ini api

Ale inga kota inten

Ale inga Maluku

Inga bahwa generasi pung generasi

Kaslahir revolusi-revolusi

dari kapal-kapal besi

yang ponoh anyer konspirasi

katong tetap hidop dar ina pung asi

tumbuh deng ina pung tali kaeng

taika satu deng yang laeng

satu dapa caka, satu baca mantra

mantra-mantra gandong, pela darah

satu sodara, biar beda sejarah

gunung seng putus ikatang

laut seng talang ingatan

He,

Buka mata

Kasbabunyi kapata

Kaluar dari atap-atap sagu

Bunuh itu ratap, bunuh itu ragu

Inja tanah, cakalele

Inja tanah, cakalele

Lia Maluku sakarang

Lia asin aer mata takumpul di karang

Lia meja ilang tampa garang

Lia ana ana ilang pendidikan

Lia sodara ilang bahasa

Lia sodara ilang rasa

Lia katong ilang budaya

Lia sodara ilang lahan

Tambah hari tambah bahaya

He,

Jangan lupa Maluku ka

Kasi tangan yang bijiruku ka

Gandeng gandong, baku gendong ka

Kamong yang di tanah ini, kamong yang di balanda ka

Bersatu bangun Maluku ka, barenti picah inga heka leka ka

Ini su waktu,

pulaka balom rubu

Biar jatuh sajuta salju

Ale tahu ale pung baju

Musti inga tiga tungku

Musti bangun Maluku

Musti kasi maju Maluku

Musti sayang Maluku

Musti cinta Maluku

Musti jadi Maluku

Musti Maluku

Musti satu,

Maluku.

Ambon, 12 – 23 Februari 2021

Simak videonya di youtube:

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout /  Ubah )

Foto Google

You are commenting using your Google account. Logout /  Ubah )

Gambar Twitter

You are commenting using your Twitter account. Logout /  Ubah )

Foto Facebook

You are commenting using your Facebook account. Logout /  Ubah )

Connecting to %s